Charles Lecat, auteur du Vimeu, nous raconte ses premières automobiles, avant 1914...

Qué d’autos, in-n’hui ! Gné n’o tout partout, à n’pus savoér d’où zzés mette ! Mais dvant l’djerre ed Quatore, qu’il étoaient’ réres ! Dins min piot pouéyis, o n’in voéyoait quasimint janmoais !
Mais su « chor route », à in tchilométe ed lo, i n’in passoait in-ne in mouéyènne tous les jours, quique foais deux, quique foais point du tout. A dépindoait.
Pour essayer d’n’in vir in-ne, nous, chés piots, éch jeudi o bièn ch’dimènche après les vrêpes, oz y allouémes, à « chor route », pis y o des coups qu’o réuchichoait. Mais mi, ch’étoait tojours aladon qu’éj y alloais qu’i n’in passoait point !

Et don, oz attindoémes in bos d’choc côte : ch’est lé miux. Comme o, point, vu qu’in montant in-ne automobile a n’va point si vite qu’in bidet au trot, si gné n’o in-ne qu’a s’in vo du côtè qu’a monte, o peut l’suire. Bièn seur, si ch’est in déchindant, qu’i vont à des vitesses du diabe (quarante-chonq pis pétête meume chinquante tchilométes dins in-ne heure), lo, y a point mouéyèn...

Oz ons attindu jusqu’à chonq heures. Il a passé des voétures à rssorts, à boédet, à tchien (des merchands d’pichon pis des ramasseux d’mouilles du Bourqué d’Aut), troais bicyclettes, deux caléches (des baigneux) mais point d’automobile.
Oz étoémes réïus d’attènde ; oz allouémes nos rin-aller tout duchemint, berdouilles couére in coup, mais vlo qu’oz intindons in teuf-teuf-teuf-teuf pis qu’o voéyons dop pore... Ech coup chi, a y est ! n’in vlo in-ne ! Pis du boin côté ! O n’n’érouémes dansé d’contintemint !
Léon i s’a mis su in bas-côté pis mi su l’aute. Austôt qu’éch « bazar » i nos o rattind (y avoait d’quoi n’n’avouér peur !) oz ons démarré touté deux au pos d’gymnastique, li à droaite, mi à gauche, qu’o n’n’éroait dit deux « gorilles » à Monsieur Fallières, éch « Président de la République ».
O n’avoémes pus qu’à gambillonner pis qu’à rbéyer. Qu’oz étouémes contints ! Ch’est in-ne belle, in-ne grande, à quate plaches, sans compter chu chauffeur.
Y o qu’chot tchaisse, lo qu’i sont chés gins, qu’al est in bos ; él restant il est in fer ; toute est peinturè in ganne ; chés lanternes « acétyléne » il étinchéllent’ au solé. A foait gramint moins d’bruit qu’in-ne voéture à bidet, vu qu’chés reues il ont des chècles in caoutchouc : est foait pour... Ch’qui vos casse vos eureilles, ch’est l’teuf-teuf d’éch «moteur », comme i dittent’, éq ch’est o qu’a foait avancher ch’l’automobile, rien qu’in mettant du pétrole eddins, qu’i péroait. Est à peinne creuyabe ! Quoi qu’o n’invintera point ! ! !
Et don, qu’éj vos diche achteure qu’échlo, d’automobile, a né rsannoait point à zz’autes. Chés quate vouéyageurs i né rbéyent’ point per dévant, i s’foaient’ vis-à-vis deux per deux, à droaite et pis à gauche. Chu chauffeur, li, il est su in-ne bantchette per dévant, derriére in querriau ; i tient in-ne manivelle dins ses mains, éq ch’est o qu’a rimplache chés djides. Il est indjinsè dins in perdessus à long poille, il o in-ne questchette à z’eureilles, des moufles in piau d’berbis. O n’in diroait in orse ! Chés vouéyageurs, ch’est deux monsieurs pis deux madames. Faut point qu’cha fuche n’importé tchéche pour vouéyager dins des péreils bazars ! Chés hommes il ont in-ne moustache aveuc des bouts pointus ; ch’est la mode ; i zzés tortingnent’ aveuc leus doaigts : ch’est in-ne otchupation d’monsieu. Gné n’a un qu’il est sé comme in reillot, pis l’aute qu’il est putôt panchu. Leu ritchimpette al est aboutonnèe jusqu’in heut : i n’ont point l’air d’avouér caud !
Chés feummes étou, qu’il ont portant des grosses mitainnes et pis des plisses boénes et caudes, i sont matchèes d’froaid : a s’voit à leu min-ne trutèe. Leu capiau il est attatchè à leu co aveuc in-ne voélette bitaclèe eq chu vint i frinchole. I nos rbéyent’ pis il ont l’air éd nos dire : « Vas-y, Jean Boin ! » (Coureur pédestre renommé).
Oz étouémes quasimint arrivès in haut d’choc côte, mi, ch’l’automobile et pis Léon, et pis o n’étouémes point pamès personne, mais vlo t-i point qu’mi j’m’inchèpe dins in-ne toffe éd ronches. Em vlo tcheu tout d’min long dins in bouso, qu’ém blouse a n’n’étoait toute imbrondjèe. 
El temps d’m’erléver pis d’échuer ch’pus gros, ch’l’automobile, qu’al étoait arrivée à plot terrain, al a filè comme in-ne arcabalète, pis deux minutes après o n’ voéyoait pus qu’des pores et pis dof feumèe.
In rintrant à no maison, j’ai rchu m’bernife : i folloait qu’Manman al déberbouille ém blouse à l’iau caude ; oui, mais l’lindemain, à l’école, mi pis min camarade éd communion, qu’éd goût qu’oz ons ieu d’raconter à zz’autes, éd piots, l’histoére éd « noz » automobile qu’ol l’avouémes bien vue, pis qu’ol l’avouémes sui dpis l’bos d’choc côte jusqu’in haut ! Bien seur, mi, j’n’ai point perlé d’ « min » bouso.

Extrait de :